உன் புன்னகையில்
எவ்வளவு தொலைதூரங்கள் இருக்கின்றன?
உன் பறக்கும் கூந்தலின்
எதிர்பாராமை
சாத்தியத்தின் எத்தனை கூறுகளைக்
கொண்டிருக்கிறது?
மெல்லிய மென்சோகம் கொண்ட
உன் முகம்
எத்தனை யுகங்களாய்
அதனை சூடிக் கொண்டிருக்கிறது?
உன் சிவந்த உள்ளங்கைகளின்
மலர்கள்
மகரந்தத்தைத் தூவிக் கொண்டிருக்கின்றன
நிலமெங்கும்
உனது ஒவ்வொரு மூச்சிலும்
நிகழ்கின்றன
ஆயிரம்
ஆயிரம்
ஜீவ மரணங்கள்
