பணி நிமித்தம்
ஊர் நீங்கிச் செல்லும்
நண்பனுக்கு
விடை கொடுக்கும் முன்
நுரை பொங்கும் அலை கடலின்
கரையில்
பாதங்கள் கரைய
நின்றிருந்தோம்

புதிதாய் நிகழும்
ஒரு புதிய துவக்கம்
எதிர்பார்ப்புகளின்
சாத்தியக் கூறுகளை
அதிகரித்துக் கொண்டே
சென்றது

விளையாட்டுச் சிறுவன்
ஒருவன்
விரல்களிலிருந்து
விடுபட்ட
பலூனை
காற்றில் துழாவி
ஓடிக்கொண்டிருந்தான்

அத்தருணம்
அக்கறைகளை வெளிப்படுத்தவோ
பிரியத்தைச் சொற்களாக்கவோ
உணர்வுகளைப் பகிரவோ
முழுக்க
தோதாய் இல்லாமல் இருந்தது

விடை கொடுக்க
நீட்டிய
கரத்தை
என் கரங்களுக்குள்
வைத்துக் கொண்டேன்

வீடு திரும்பிய பின்
ஒட்டிக் கொண்டு
வந்து சேர்ந்த
கடல் மணல் போல்
ஈரமாயிருந்தன
நட்பின் நினைவுகள்