ஒரு சிறிய மகத்தான செயல்

ஒரு புதிய பேட்ரியைச் செருகி
ஒரு கடிகாரத்தை ஓடச் செய்யும் போது
நாளும் நமை சுமக்கும் டூ-வீலரை
துடைத்து வைக்கும் போது
சாலையில் காலைப்பொழுதில் நடக்கையில்
வழிந்து கொண்டிருக்கும் தண்ணீரை நிறுத்தும் போது
செல்லுமிடம் ஒன்றின் வாசலில்
மனிதர்கள் போல் பிரிந்து கிடக்கும்
செருப்புகளை
பள்ளியின் காலை பிரேயர் போல்
வரிசைப்படுத்தும் போது
கையில் உணவுடன் வீதிநாய்
எப்போது வரும் என பார்த்திருந்து
பலமுறை பேர் சொல்லி அழைக்கும் போது
ஒரு பெட்டிக்கடைக்காரரிடம் நன்றி கூறும் போது

நாம்
சிறிய
மகத்தான
செயல்
ஒன்றைச்
செய்கிறோம்