ஒரு காதலைச் சொல்லும் போது

ஒரு காதலைச் சொல்லும் போது
நீரடிவாரத்தில்
பின்னிச் சுழன்று பிணைந்திருக்கும்
கையில் ஒட்டிய ரத்தமென
பிசுபிசுக்கும்
அன்றாடத்தின்
கோடுகளும் கணக்குகளும்
உருவாக்கும் எல்லையிலிருந்து
நிகழ்கிறது
ஒரு வெளியேற்றம்
ஒரு விடுபடல்
ஒரு விடுதலை

ஒரு கண்ணாடி டம்ளரின்
ஐஸ் கட்டிகள் மிதக்கும்
ஐஸ் வாட்டரின்
சில்லென்ற தட்பம்
உணரும் உள்ளங்கையளவு
ஜீவன்
எழுகின்றது
நீரளவுக்கு மேல் நிற்கும் மலரென
அதன் மேல் பறக்கும் சிட்டுக்களென
இன்னும் உயரப் பறக்கும் மேகம்
ஆகாய விண்மீன்