மோட்டார்சைக்கிளுடன் உரையாடல்

ஆயத்தமாகு
புறப்படு
இந்த உலகில் இன்னும்
நாம் காணவேண்டிய நிலங்கள்
சந்திக்க வேண்டிய மனிதர்கள்
பார்க்க வேண்டிய காட்சிகள்
எத்தனை எத்தனையோ

உடன்
எவரும் வரலாம்
வராமலும் போகலாம்

நீயும்
நானும்
என்றுமிருப்போம்

உன்னை என்றுமே வேறொரு இருப்பாய் எண்ணியதில்லை
நெடுந்தொலைவுகளில்
ஓயாமல் என்னை  அழைத்துச் சென்ற போது
சில கணங்கள்
உன் அன்பை எண்ணி
கண்ணீர் சிந்தியிருக்கிறேன்

ஒரு புதிய பயணத்தைத் திட்டமிடுகிறேன்
தயாராய் இரு
விரைவில் புறப்படுவோம்
என் இனிய நண்பனே