உறங்கு வதுபோலும் சாக்காடு உறங்கி
விழிப்பது போலும் பிறப்பு
- திருக்குறள்
நடைபாதைக் கடையில்
ஈரம்சொட்டிக் கொண்டிருக்கும்
விரிக்கப்பட்டுள்ள பிளாஸ்டிக் தாளுக்கு மேலே
அடுக்கி வைக்கப்பட்டுள்ள
கொய்மலர்கள்
புத்தம் புதிதாய்ப் பார்க்கின்றன
மா நகரத்தின் அதிகாலை பாதசாரிகளை
அங்காடிக் காய்கறிகள் பசுமை
பேரன்பாய் நிறைந்து
பயணப்படுகின்றது
வயர் கூடைகளுக்கு வெளியே
தலைநீட்டிக் கொண்டு
பரபரப்பாக அடுப்பை பற்ற வைக்கிறாள்
தோசைக்கடை வைத்திருக்கும் பெண்
எரிவாயு அடுப்பின் ரீங்காரம்
அறிவிக்கிறது
அவகாசத்தையும் அவசரத்தையும்
உறங்கி விழித்தவர்கள் முன்னால்
எல்லையற்று
விரிந்து கிடக்கிறது
இந்த உலகம்
