சப்தம்

ஞாயிறு
---------
ஐயங்களை
சஞ்சலங்களை
தயக்கங்களை
குழப்பங்களை
சூழும் சின்ன இடர்களை
ஒன்றுமில்லை
ஒன்றுமில்லை
என்றாக்கி
பிறக்கிறது
அலை தொடும்
முதல்
சூரியக்கதிரிலிருந்து
ஒரு தினம்
ஒரு நம்பிக்கை 

திங்கள்
-----
இல்லம் திரும்புபவர்கள்
நம்பிக்கை
கொள்கிறார்கள்
இனிமையின் கனவுகள்
இன்னும்
இன்னும்
என நிறைகின்றன
அகத்தில்
நிறைய நம்பிக்கைகள்
நிறைய திட்டங்கள்
நிறைய சந்தோஷங்கள்
வழித்துணையாக
எப்போதும்
திங்கள்

மங்களம்
------
பற்றி எரியும் மண்
நாகம் உறையும் புற்று
இள விரல்களால்
தீயைத் தீண்டி
மஞ்சள் தடவுகிறாள்
குங்குமம் அப்புகிறாள்
பெண் குழந்தை
சிவந்திருக்கும் உள்ளங்கையில்
ஒட்டிக் கொண்டு வருகிறது
குருதிச் சிவப்பும்
மஞ்சள் வானமும்
ஒரு துளி தீயும்

பாத ரசம்
-------
மென் பாதம்
அணி சூடுகிறது
மென் பாதங்கள்
முத்தமிடப்படுகின்றன
அகனமர்கின்றன
மலர்கின்றன
சென்னி சூடப் படுகின்றன
முடிவின்மையின் பரப்பில்
பாதையாகின்றன

பொருள் முதல்
-----------
இல்லம்
உன் கனவாய் இருந்தது
உன் சொற்கள்
அதைக் குறித்தே பேசின
சிற்றில்
சிற்றில்
என வலியுறுத்தினாய்
எளிமையாகவேனும்
என இறைஞ்சினாய்
அதன் குறைந்த பரப்பில்
கணமும்
நீ ஏற்றிய தீபம் 
சுடர்கிறது
உன் கோலங்களுக்கு
நடுவே
வந்து சேர்கின்றன
ஜீவ ராசிகள்
தேவதைகள்
உனது உள்ளங்கையின் கனிவு
தானியங்களின்
தாவரங்களின்
தண்ணீரின்
ருசி ஆகிறது
சிற்றில் அமைந்ததும்
நீ
தெய்வமானது 
எப்படி?

வெள்ளி
------
கன்றறியும் பாலின் தாய்மை
தூ வெண் மலர்
மணம் நிறைக்கும் புவி
பெருக்கெடுக்கும்
வானின் அமுத நதி
விண் சுமந்து
புவி வீழும்
மழைத் துளிகள்
ஒலி ஒழுங்கு
அக இசை
பனி மலை ஒளி
மௌனம் மௌனம் மௌனம்

காகம்
-----
பலிச்சோறுகளின் கரை
மெல்ல ஊர்கிறது நதி
பிராத்தனைகள்
அரற்றல்கள்
பிழை பொறுக்க
மன்றாடல்கள்
குருதி
கண்ணீர்
வலி
துயரம்
வட்டமிடும் காக்கைகள்
கரையும் காக்கைகள்
அலகால் கொத்தி கிளறி
சோறுண்ணும் காக்கைகள்
மன்னிக்கும் காக்கைகள்
மன்னிக்கும் காக்கைகள்
மன்னிக்கும் காக்கைகள்