நிலமெங்கும் இருக்கிறார்கள்
புன்னகைக்கும் சிறுவர்கள்
சிறிய எளிய காரணங்களும்
எளிய சிறிய காட்சிகளும்
அவர்களுக்குப்
போதுமானதாக இருக்கிறது
புன்னகைக்க
பறவை சிறகடித்து கிளையில் அமரும் போது
கிளையிலிருந்து பறவை வானெழும் போது
குட்டி நாய் ஒன்றைக் காணும் போது
வெயிலில் நிற்கும் போது
தூறல் கொட்டிடும் போது
என
பலப்பல தருணங்களில்
புன்னகைக்கின்றனர்
புன்னகைக்கும் சிறுவன்
இன்று
தந்தையுடன்
பெட்ரோல் டேங்க் மேல்
அமர்ந்து
பயணித்த சிறுவன்
அவன் வாகனத்தை
என் வாகனம்
தாண்டும் போது
என்னைப் பார்த்து
புன்னகைத்தான்
அப்புன்னகையின் ஒளி
சந்திர சூரியர்களுக்குரியது
அதை
வான் அறியும்
நிலம் அறியும்
