நண்பருக்கு ஒரு மனைவணிகக் கடிதம் (நகைச்சுவைக் கட்டுரை)

அன்புள்ள அண்ணா,

1.என் வாழ்வில் நான் சந்தித்த உற்சாகமும் நம்பிக்கையும் மகிழ்ச்சியும் நிறைந்த மனிதர்களில் நீங்களும் ஒருவர். லௌகிக வாழ்வில் ஒரு மனிதன் உற்சாகமும் நம்பிக்கையும் மகிழ்ச்சியும் கொண்டிருக்கிறான் என்பது மகத்தான விஷயம். செல்வம் அதிக அளவில் இருப்பது உற்சாகம் நம்பிக்கை மகிழ்ச்சியைக் கொண்டு வந்து விடும் என மானுடர் பெரும்பாலானோர் எண்ணுகின்றனர். அது உண்மையல்ல. அது அப்படியுமல்ல. செல்வம் உற்சாகம் நம்பிக்கை மகிழ்ச்சிக்கு துணை செய்யும். அத்துணைக்கு 1 சதவீத மதிப்பு அளிக்கலாம் ; 9 சதவீத மதிப்பு அளிக்கலாம் ; 25 சதவீத மதிப்பு அளிக்கலாம். அதற்கு மேல் அதற்கு மதிப்பெண் வழங்கப்படுமாயின் அம்மதிப்பீடு பிழையான மதிப்பீடு ஆகும்.  

2. 9 கி.மீ தொலைவில் இருக்கும் ஊரில் இருக்கும் ஒரு குளத்தை ஒரு ஏரியை ஒரு நதியை ஒருவனுக்குப் பார்க்க வேண்டும் என ஓர் அக உந்துதல் ஏற்பட்டு அவன் அதனை நோக்கி புது வெள்ளத்தை நோக்கி உற்சாகமாக நடக்கத் தொடங்குபவனாயின் அவனே மனித உயிரைக் கொண்டவன். அவனுக்கு செல்வமோ வசதியோ வாகனங்களோ உதவி செய்யும். செல்வம் உள்ள அனைவருக்கும் தன்னைத் தாண்டிய விஷயங்கள் மீது அக உந்துதல்  அத்தனை எளிதில் ஏற்பட்டு விடாது. 

3. கடந்த 30 மாதங்களாக மனை வணிகம் குறித்த முயற்சிகளிலும் உரையாடல்களிலும் ஈடுபட்டிருந்தோம். அந்த நாட்கள் பரபரப்பானவை. அந்த நாட்களிலிருந்து நான் நிறைய கற்றுக் கொண்டேன். தங்களுடன் இருந்த பொழுதுகள் அந்தக் கற்றலை மேலும் தீவிரப்படுத்தின. தாங்கள் அளித்தவற்றுக்கு நன்றி. 

4. மனை வணிகம் மிகவும் பரபரப்பான தொழில். மேட்டின் உயரங்களையும் பள்ளத்தின் ஆழங்களையும் அடுத்தடுத்து கடந்து செல்லும் பயணம் அது. எந்நிலையிலும் தன்னைக் காத்துக் கொள்வதும் எது சாதகமான சூழ்நிலை என்பதை அறிந்திருப்பதும் அச்சூழ்நிலை கனியும் வரை காத்திருப்பதும் இடர்கள் ஏற்படாமல் தவிர்ப்பதும் எதிர்பாராமல் ஏற்படும் இடரை அறிவுபூர்வமாக அணுகித் தீர்ப்பதும் மனைவணிகத்துக்கு தேவைப்படும் குணங்கள். காலசுழற்சியை நம் மரபு சுக்ல பட்சம், கிருஷ்ண பட்சம் என வகைப்படுத்துகிறது. மனை வணிகத்தின் சுக்ல பட்ச தன்மைகளை நான் கூறியுள்ளேன். இந்த வணிகத்தில் ஈடுபடும் அனைவருக்கும் இதில் இருக்கும் கிருஷ்ண பட்சமும் தெரியும். இரண்டிலும் தெளிவடையும் போது முழுப் புரிதல் உண்டாகும்.

5. அண்ணா! தங்களுடன் இணைந்து விவாதித்த நாட்களில் நான் மனை வணிகத்தின் சுக்ல, கிருஷ்ண பட்சங்கள் இரண்டையும் அறிந்தேன். மானுடர்கள் நாம் அனைவருமே எல்லா நாட்களும் ஒவ்வொரு நாளும் கற்றுக் கொண்டே இருக்கிறோம். 

6. எனது உறவினர் ஒருவர் ஒரு சொத்தை விற்பனை செய்து கையில் கணிசமான தொகையை வைத்திருக்கிறார். ’’கணிசமான’’ என்றால் 63,000 சதுர அடி மனையை வாங்கும் அளவுக்கு என்று பொருள். அவரிடம் 63,000 சதுர அடி மனை குறித்து சொன்னேன். முதலீடு செய்தால் அந்த வணிகத்தில் 400 சதவீத லாபம் நிச்சயம் கிடைக்கும். 200 சதவீதம் முதலீடு செய்பவருக்கு. மீதம் 200 சதவீதத்தை நீங்களும் நானும் சமபாகமாக பிரித்துக் கொள்வோம் என்பதைக் கூறினேன். அவர் முதலீடு செய்யும் தொகைக்கு அவருக்கு கிடைக்கும் லாபம் திருப்தியெனில் மட்டும் இதில் இறங்கவும் என உறவினரிடம் கூறினேன். 

7. உறவினர் மொத்த சொத்தையும் எனது பெயரில் பதிவு செய்து கொள்ளுமாறு கூறினார். மொத்த மனைப்பரப்பில் பாதியை சிறு சிறு மனைகளாக விற்பனை செய்து அந்தத் தொகையை முழுமையாக அவருக்கு அளித்து விட்டு அவருக்கு வந்து சேர வேண்டிய தொகை வந்து சேர்ந்ததும் மீதி மனையை நாம் பொசிஷன் எடுத்துக் கொண்டு நமக்குள் பிரித்துக் கொள்வது என்று கூறினார். உறவினருக்கு நான் பரிச்சயம் உடையவன் என்பதால் என் பெயரில் நிலம் இருப்பது அவருக்கு பாதுகாப்பு எனக் கருதுகிறார். அவருக்குச் சேர வேண்டிய தொகை கிடைத்த பின் தான் மீதி நிலத்தை நாம் பொசிஷன் எடுக்க முடியும் என்பதால் எவ்வளவு விரைவில் விற்பனையை முடிக்கிறோமோ அவ்வளவு விரைவில் அது நமக்கு உகந்தது என நாம் எண்ணுவோம் என உறவினர் எண்ணுகிறார். 

8. எனக்கு அவர் கூறும் விஷயங்கள் சம்மதம். தங்கள் அபிப்ராயம் என்ன என்பதைத் தெரிவிக்கவும். 

9. ஒரு விஷயத்தை இப்படித்தான் செய்யத் திட்டமிட்டுள்ளோம் என வெளிப்படையாகத் தெரிவித்து விட்டு செய்வது மனை வணிகத்தில் உதவிகரமாக இருக்கிறது. நமது திட்டமிடல்கள் நிகழ்ந்தால் மகிழ்ச்சி ; நிகழவில்லையென்றால் ஏன் நிகழவில்லை என்பதை அறியும் கல்விக்கு வாய்ப்பு. 

10. உறவினரின் முன்னெடுப்பை ஆராய்ந்து சீர்தூக்கிப் பார்த்து தங்களுக்கு சம்மதம் எனில் என்னைத் தொடர்பு கொண்டு தகவல் தெரிவிக்கவும். சேர்ந்து செயல்பட மிகுந்த ஆர்வத்துடன் இருக்கிறேன். 

அன்புத் தம்பி,

பிரபு 

விழுப்புரம் ரயில் நிலைய பார்க்கிங் - சி பி கி ராம் ஸ் புகார்

 14.11.2026 அன்று மதியம் விழுப்புரத்துக்கு எனது இரு சக்கர வாகனத்தில் வந்திருந்தேன். விழுப்புரம் ஜங்ஷனில் உள்ள ரயில்வே வாகன பார்க்கிங் இடத்தில் எனது வண்டியை பார்க் செய்தேன். நேரம் அப்போது மாலை 3.30. பார்க்கிங் பொறுப்பாளர்களாக அங்கே இரண்டு நபர்கள் இருந்தனர். நான் வண்டியை பார்க் செய்து விட்டு வெளியே வரும் போது பார்க்கிங் கட்டணம் வசூலிக்க உள்ள மேஜையில் எனது வாகன எண்ணைக் கேட்டு எழுதிக் கொண்டு எப்போது திரும்பி வந்து வண்டியை எடுத்துக் கொள்வீர்கள் எனக் கேட்டனர். சென்னை – விழுப்புரம் மெமு ரயிலில் இரவு 9.30 அளவில் திரும்பி வந்து வண்டியை எடுத்துக் கொள்வேன் எனக் கூறினேன். வாகன பார்க்கிங் கட்டணம் ரூ.20 எனக் கூறி என்னிடம் ரூ.20 பெற்றுக் கொண்டு ரசீதில் ரூ.20 எனக் குறிப்பிட்டு என்னிடம் அளித்தனர். அந்த ரசீதில் எனது வாகன எண்ணின் கடைசி 4 இலக்கங்கள் எழுதப்பட்டிருந்தது. அப்போது நான் அங்கிருந்த ரயில்வே துறையின் பார்க்கிங் கட்டண விபர அறிவிப்புப் பலகையைப் பார்த்தேன். அதில் இரு சக்கர வாகன பார்க்கிங் கட்டணம் 12 மணி நேரத்துக்கு ரூ.10 என இருந்தது. அதனை சுட்டிக் காட்டி ஏன் என்னிடம் ரூ.20 வசூல் செய்தீர்கள் என அவர்களிடம் கேட்டேன். வசூல் செய்யும் இடத்தில் இருந்த இருவரும் சைக்கிளுக்குத்தான் 12 மணி நேரத்துக்கு பார்க்கிங் கட்டணம் ரூ.10 ; இரு சக்கர வாகனத்துக்கு ரூ.20 எனக் கூறினர். நான் மெமு ரயிலைப் பிடித்து மேல்மருவத்தூர் செல்ல வேண்டியிருந்ததால் பேச்சைத் தொடராமல் ரயில் டிக்கெட் எடுக்க சென்று விட்டேன். எனது வேலை முடிந்த பின் நான் திட்டமிட்டவாறு சென்னை – விழுப்புரம் மெமு ரயிலில் விழுப்புரம் திரும்பினேன். ரயில்வே பார்க்கிங் சென்று வாகனத்தை எடுத்துக் கொண்டு வசூல் மேஜைக்கு வந்தேன். ரசீதைக் கொடுத்தேன். வாங்கி வைத்துக் கொண்டனர். ரசீதில் கையொப்பம் இட்டுத் தருமாறு அவர்களிடம் கேட்டேன். அவ்வாறு கொடுப்பதற்கில்லை எனக் கூறினர். நாம் திரும்பி வந்து வண்டியை எடுக்கும் 9.45 என்னும் நேரத்தை ரசீதில் எழுதிக் கொடுங்கள் ; ஒளிப்படம் எடுத்துக் கொள்கிறேன் எனக் கேட்டேன். அப்போது அங்கிருந்த இருவரில் ஒருவர் உரையாடல் மாமூல் உரையாடலாக இல்லாமல் இருப்பதை உணர்ந்து என்னிடம் ரூ.10 திருப்பிக் கொடுத்து விட்டார். நான் வாங்கிக் கொண்டு வீடு திரும்பி விட்டேன். நேற்று (14.11.2026) நடந்த சம்பவம் குறித்து இன்று ( 15.11.2026) புகார் அளிக்கிறேன். எனது புகார் என்னவெனில் விழுப்புரம் சந்திப்பு ரயில்வே பார்க்கிங் ஒப்பந்தக்காரர் தினமும் 12 மணி நேர கால இடைவெளியில் இரு சக்கர வாகனங்களை பார்க் செய்து எடுத்துச் செல்லும் பொதுமக்களிடம் ரயில்வே நிர்ணயித்த ரூ.10 கட்டணத்துடன் கூடுதல் கட்டணமாக ரூ.10 வசூல் செய்கிறார். இதனால் தினமும் ஆயிரக்கணக்கான ரூபாய் முறைகேடாக பொதுமக்களிடமிருந்து பறிக்கப்பட்டு முறைகேடான ரயில்வே ஒப்பந்ததாரர் கைகளுக்கு சென்று சேருகிறது. இது ஒரு தனிநபரின் ரூ.10 தொடர்பான விஷயம் மட்டுமல்ல. எனக்கு நடந்த சம்பவம் முறைகேடு இந்த விஷயத்தில் பெரிய அளவில் நடக்கிறது என்பதற்கான சிறந்த உதாரணம் ஆகும். விழுப்புரம் ரயில் சந்திப்பு போன்ற தினமும் ஆயிரக்கணக்கான பயணிகள் பயணிக்கும் ரயில் நிலைய பார்க்கிங்கில் தினமும் சராசரியாக 300 இரு சக்கர வாகனங்கள் 12 மணி நேரத்துக்குள் பார்க்கிங் செய்யப்பட்டு எடுக்கப்படுகின்றன எனக் கொண்டால் அந்த 300 வாகனங்களுக்கும் முறைகேடாக வசூலிக்கப்படும் கூடுதல் கட்டணம் ஒரு நாளைக்கு ரூ.3000 என்றாகிறது. ஓராண்டுக்கு கணக்கிட்டால் அந்தத் தொகை ரூ.10,00,000 ஆகும். இந்தப் புகாரின் நோக்கம் விழுப்புரம் ரயில் நிலைய பார்க்கிங்கில் நிகழும் ஆண்டுக்கு ரூ.10,00,000 அளவிலான ஊழல் முறைகேட்டை ரயில்வே உயர் அதிகாரிகள் கவனத்துக்குக் கொண்டு வருவதே ஆகும். ரயில்வே அதிகாரிகள் இந்த விஷயம் குறித்து உரிய விசாரணை நடத்தி ஆண்டுக்கு ரூ.10,00,000 பொதுமக்கள் பணத்தை முறைகேடாக பறிக்கும் ரயில் நிலைய பார்க்கிங் ஒப்பந்ததாரர் மீதும் இந்தத் தவறைக் கண்டறிந்து சரிசெய்யாமல் உடந்தையாக இருக்கும் விழுப்புரம் ரயில் நிலைய உரிய அதிகாரிகள் மீதும் சட்டபூர்வமான நடவடிக்கை மேற்கொள்ள வேண்டும் என்றும் விழுப்புரம் ரயில் நிலைய பார்க்கிங் ஒப்பந்ததாரரின் ஒப்பந்தத்தை ஒப்பந்த விதிகளின் படி ரத்து செய்ய வேண்டும் என்றும் கேட்டுக் கொள்கிறேன். எனது புகாருக்கான ஆதாரங்களாக எனக்கு வழங்கப்பட்ட பார்க்கிங் ரசீதின் ஒளிப்படம், எனது பயணச்சீட்டுகளின் ஒளிப்படம் ஆகியவற்றை இத்துடன் இணைத்துள்ளேன். பார்க்கிங் ஒப்பந்ததாரரின் 14.11.2026க்கான ரசீது நகல் புத்தகத்தையும் பார்க்கிங் பகுதியின் சி சி டி வி பதிவுகளையும் விசாரணைக்கு உதவும் விதத்தில் கோரிப் பெற்று தன் வசம் வைத்துக் கொள்ளுமாறு ரயில்வே நிர்வாகத்தை கேட்டுக் கொள்கிறேன். இவ்விதமான முறைகேடுகளில் ஈடுபடுவோர் பொதுவாக எண்ணுவது யாதெனில் நாட்டின் குடிமக்கள் முறைகேடுகளையும் ஊழலையும் எதிர்த்து ஒரு சிறு குரல் கூட எழுப்பாமல் சிறு எதிர்ப்பு கூடத் தெரிவிக்காமல் ஊழல்வாதிகளுக்கும் முறைகேட்டாளர்களுக்கும் பயந்து பணிந்து இருப்பார்கள் என்பதே. தங்களைக் கேட்பார் யாருமில்லை என்னும் அசட்டுத் துணிச்சல் அவர்களிடம் இருக்கிறது. அந்த அசட்டுத் துணிச்சலை உடைத்தெறிய வேண்டும் என்னும் உணர்விலேயே இந்தப் புகாரைப் பதிவு செய்கிறேன். இந்தப் புகார் தொடர்பாக விரிவான விசாரணை மேற்கொண்டு விழுப்புரம் ரயில் நிலைய பார்க்கிங் ஒப்பந்தக்காரர் மீதும் அவருக்கு உடந்தையாக இருக்கும் ரயில்வே அதிகாரிகள் மீது சட்டபூர்வமான நடவடிக்கை எடுக்கவும் விழுப்புரம் ரயில் நிலைய பார்க்கிங் ஒப்பந்தக்காரரின் ஒப்பந்தத்தை ரத்து செய்து பொதுமக்களிடம் ரயில்வே நிர்ணயிக்கும் நியாயமான கட்டணத்தை வசூல் செய்யும் ஒப்பந்ததாரருக்கு பார்க்கிங் ஒப்பந்தம் அளிக்கவும் கேட்டுக் கொள்கிறேன். ஓர் இந்தியக் குடிமகனாக இந்திய அரசியல் சாசனம் குடிமக்களுக்கு வகுத்திருக்கும் அடிப்படைக் கடமையையே இந்தப் புகார் மூலம் செய்திருக்கிறேன். உரிய நடவடிக்கை மேற்கொள்ளப்படாமல் போகுமாயின் சட்டபூர்வமான அடுத்த கட்ட நடவடிக்கைகளை மேற்கொள்வேன் என்பதையும் தெரிவித்துக் கொள்கிறேன்.

பலகைப் பயிற்சி

 சில நாட்களாக ஒரு உடற்பயிற்சியை செய்து வருகிறேன். அதாவது, இரு கைகளையும் கோர்த்துக் கொண்டு முழங்கைகளாலும் காலின் பத்து விரல்களாலும் மட்டும் உடலின் எடையை ஒரு பலகையைப் போல் தாங்குவது. ஒரு நிமிடம் இவ்வாறு இருப்பது; பின்னர் ஒரு நிமிடம் இடைவெளி விட்டு மேலும் ஒரு நிமிடம். நாள் பொழுதில் 5 அல்லது 6 முறை செய்கிறேன். இந்தப் பயிற்சி உடலுக்குப் புத்துணர்வு தருகிறது. உடனடியாக மனமாற்றத்தை ஏற்படுத்துகிறது. உடலைக் காட்டிலும் மனவலிமைக்கு சிறந்த பயிற்சியாக உள்ளது. 

நேரு குடும்பமும் அரசியல் அதிகாரமும்

 

நேரு என்னும் ஹிந்திச் சொல்லுக்கு ‘’கால்வாய்’’ என்று பெயர். தில்லியின் கால்வாய் ஒன்றின் அருகில் அவர்கள் வீடு அமைந்திருந்ததால் அக்குடும்ப உறுப்பினர்கள் நேருக்கள் என ஊராரால் அழைக்கப்பட்டனர். ஜவஹர்லால் நேரு குடும்பத்தினரை நேரு என்னும் பின்னொட்டு தொடர்ந்து வந்ததற்கு அதுவே காரணம். ஜவஹர்லால் நேரு தன் சுயசரிதையில் இதனைக் குறிப்பிடுகிறார்.  நேரு குடும்பம் ‘’கௌல்’’ பிராமணர் என்னும் சாதியைச் சேர்ந்த குடும்பம். எனவே அவர்கள் கௌல் நேரு குடும்பத்தினர் என அழைக்கப்பட்டனர். பின்னர் ‘’கௌல்’’ மறைந்து போய் ‘’கால்வாய் (நேரு)’’ மட்டும் நிலைத்தது. ( சில ஆண்டுகளுக்கு முன்னால் ஜவஹர்லாலின் கொள்ளுப் பேரனும் மோதிலாலின் எள்ளுப் பேரனுமான ராகுல் காந்தி மத்தியப் பிரதேசத்தில் மாநிலத்தில் பாராளுமன்றத் தேர்தலில் பரப்புரைக்குச் சென்றிருந்த போது சட்டைக்குள் இருந்த பூணூலை வெளியே எடுத்துக் காட்டி தான் ‘’தத்தாத்ரேய கோத்ர கௌல் பிராமணன்’’ என்று சொல்லி காங்கிரஸ் கட்சிக்கு ஓட்டு கேட்டார் என்பது பத்திரிக்கைகளில் செய்தியாக வந்தது)

மோதிலால் நேரு அக்குடும்பத்தின் முதல் அரசியல்வாதி. வழக்கறிஞராக இருந்திருக்கிறார். காங்கிரஸின் உயர் பொறுப்புகளை வகித்தவர். 

 

மோதிலால் நேருவின் மகனான ஜவஹர்லால் நேரு காங்கிரஸில் சேர்ந்து செயலாற்றுகிறார். பல காங்கிரஸ் தலைவர்களில் அவரும் ஒருவர். மகாத்மா காந்தியுடன் அவருக்கு உளநெருக்கம் ஏற்படுகிறது. இருப்பினும் நேருவின் மனம் ஐரோப்பிய சிந்தனைத் தாக்கம் கொண்டதாகவே இருந்தது. ஐரோப்பிய சித்தாந்தங்கள் மேல் ஐரோப்பிய வாழ்க்கைமுறை மேல் நேருவுக்கு தன் வாழ்நாளின் இறுதி மூச்சு வரை பெரும் மோகம் இருந்தது. தேசிய விடுதலை இயக்க காலகட்டத்தின் நாயகர்கள் பலர் வாழ்வில் ஐரோப்பிய சிந்தனை தாக்கம் ஏற்படுத்துவதையும் பின்னர் அவர்கள் அதிலிருந்து முன்னகர்ந்து தங்களுக்கு சாத்தியமான வகையில் இந்திய மரபினைக் கண்டடைதலையும் அதன் ஒரு பகுதியாக அவர்கள் ஆவதையும் காணலாம். டாக்டர் பீமராவ் அம்பேத்கர் ஒரு சிறந்த உதாரணம். ராம் மனோகர் லோகியா இன்னொரு உதாரணம். அரவிந்தர், ஜெயபிரகாஷ் நாராயணன் ஆகியோர் மற்ற சிறந்த உதாரணங்கள். நேருவுக்கு கம்யூனிசம் மேல் பெரும் நம்பிக்கை இருந்தது. அரசியல்ரீதியாக அவர் மீது வைக்கப்படும் பல விமர்சனங்களுக்குப் பின்னால் அவரது கம்யூனிச மனச்சாய்வு இருப்பதைக் காணலாம். அவரது அரசியல் வாழ்க்கையை கவனித்துப் பார்ப்போமாயின் கம்யூனிசத் தாக்கம் இல்லாமல் அவர் எடுத்த முடிவுகள் அவருக்கு புகழ் சேர்ப்பதையும் எங்கெல்லாம் கம்யூனிசத் தாக்கத்துடன் அவர் முடிவு எடுத்தாரோ அங்கெல்லாம் அவரது அரசியல் செயல்பாடுகள் சறுக்கியிருப்பதையும் காணலாம். காஷ்மீர் விவகாரத்தை அவர் கையாண்ட விதமும் சீனா நம் நாட்டை ஆக்கிரமித்ததும் அவரது அரசியலின் பெரும் தோல்விகள். இந்த இரண்டு விஷயங்களுக்கும் நேருவே நேரடியான பொறுப்பாளி ஆவார். இந்திய அரசியலை அரசியல் மற்றும் அதிகார வர்க்கத்தின் கைகளுக்கு முழு அதிகாரத்துடன் அளிக்க வேண்டும் என்று தீவிரமான விருப்பம் கொண்டிருந்தவர் நேரு. நேருவின் சமகாலத்தவர்களான ராஜாஜி, பீமராவ் அம்பேத்கர், ஜெயபிரகாஷ் நாராயண் ஆகியோர் நேரு சிந்தனையுடன் நேரு செயல்பாட்டுடன் முரண்பட்டு விலகியவர்கள் என்பதைக் காணலாம். இந்தியாவின் 543 சமஸ்தானங்களை இந்தியாவுடன் இணைக்கும் பொறுப்பை நாட்டின் ஊழ் ‘’சர்தார்’’ வல்லபாய் படேலுக்கு அளித்தது. அதனால் நாடு இன்றிருக்கும் உருவத்தில் இருக்கிறது. நேரு அதன் பொறுப்பை ஏற்றிருப்பார் எனில் தேசத்துக்கு இன்றிருக்கும் உருவம் வாய்த்திருக்குமா என்பது இமாலய ஐயம் ஆகும். 

நேருவைத் தொடர்ந்து அவரது மகள் இந்திரா குறுகிய கால இடைவெளியில் காங்கிரஸ் பொறுப்பை ஏற்கிறார். அவரும் கம்யூனிசம் மேல் பெரும் நம்பிக்கை கொண்டவரே. அவர் எடுத்த முடிவுகள் சில நாட்டுக்கு நன்மையை அளித்திருக்கின்றன. உலகின் பெரிய இஸ்லாமிய நாடாக இருந்த பாகிஸ்தானை உடைத்து பங்களாதேஷ் என்னும் நாட்டை உருவாக்கினார். அது அவரது சாதனை. ‘’நெருக்கடி நிலை பிர்கடனம்’’ மூலம் நம் நாட்டை சோவியத் யூனியனின் காலனி நாடாக ஆக்க முயன்றார் ; தனது சொந்த அரசியல் லாபங்களுக்காக பஞ்சாப்பில் தீவிரவாதம் ஆழமாக வேரூன்ற வழி வகுத்தார். இவை நாட்டுக்கு அவர் இழைத்த வேதனைகள். அவரது கணவர் பெயர் ஃபெரோஸ் ஜஹாங்கீர் KANDY என்பதாகும்.தனது கணவரின் KANDY என்னும் பின்னொட்டை உச்சரிப்பில் இருக்கும் ஒற்றுமையைப் பயன்படுத்தி GANDHI என மாற்றிக் கொண்டார். நாட்டு மக்கள் மனதில் பதிந்திருந்த காந்தி நேரு என்னும் குரு சிஷ்ய உறவை தன் அரசியல் அபிலாஷைகளுக்குப் பயன்படுத்த அவர் செய்த விஷயமாகும் இது. அவருக்குப் பின் வந்த அத்தனை நேரு குடும்பத்தினரும் அதனைச் செய்கின்றனர்.  

இந்திய அரசியலில் ரௌடிகளின் பங்களிப்பை நுழைத்தவர்; அனுமதித்தவர்; அங்கீகரித்தவர் என இந்திரா காந்தியைக் கூற முடியும். தேசிய இயக்கமான காங்கிரஸை துதிபாடிகளின் ரௌடிகளின் கூடாரமாக ஆக்கியதில் இந்திராவுக்கும் அவரது இளைய மகன் சஞ்சய்க்கும் பெரும்பங்கு உண்டு. சஞ்சய் தலைமை வகித்த ரௌடி கும்பலே நாடெங்கும் நெருக்கடி நிலை அத்துமீறல்களை வன்முறைகளை அரங்கேற்றியது. 

இந்திய அதிகார அமைப்பில் ஊழல் என்பது முக்கிய சிக்கலாக இருந்திருக்கிறது. எம்.எல்.ஏ , எம்.பி க்கள் மீது ஊழல் புகார் இருந்ததுண்டு ; மாநில மத்திய மந்திரிகள் மீது ஊழல் புகார் இருந்ததுண்டு. முதலமைச்சர்கள் மீது ஊழல் புகார் இருந்ததுண்டு. நாட்டின் பிரதமர் மீது நேரடியாக ஊழல் குற்றச்சாட்டை அவருடைய அமைச்சரவையில் பாதுகாப்பு அமைச்சராகவும் நிதியமைச்சராகவும் இருந்த ஒருவர் சுமத்தியது என்பது ராஜிவ் காந்தி காலத்தில் தான் நடந்தது. ‘’கலி கலி கி ஷோர் ஹை ; ராஜிவ் காந்தி சோர் ஹை’’ என்னும் தேர்தல் முழக்கத்தால் மக்கள் ராஜிவை அதிகாரத்தில் இருந்து தூக்கி எறிந்தனர். போஃபர்ஸ் பீரங்கி கொள்முதலில் நாட்டின் பிரதமரான ராஜிவுக்கு லஞ்சம் அவரது மனைவி ஆண்டானியோ மெய்னோ மூலம் தரப்பட்டது என்பதே போஃபர்ஸ் ஊழல் புகார். ராஜிவ் காந்தியின் அரசியல் முதிர்ச்சியின்மையால் அவர் தலையிட்ட இலங்கைப் பிரச்சனை நாட்டின் பாதுகாப்புக்கே பெரும் அச்சுறுத்தலாய் அமைந்தது. 

ராஜிவ் காந்தி விடுதலைப் புலிகளின் தற்கொலைப்படை தாக்குதலுக்கு உள்ளாகி உடல் சிதைந்து இறந்த பின்னர் பல ஆண்டுகள் அரசியல் வேண்டாம் என ஒதுங்கியிருந்த ராஜிவின் மனைவியான ஆண்டோனியோ மெய்னோ காந்தி என்னும் சோனியா காந்தி பின்னர் அரசியலுக்கு வந்தார். நாட்டின் பிரதமர் ஆக முயன்றார். 

1999ம் ஆண்டு வாஜ்பாய் அரசு ஒரு வாக்கில் கவிழ்ந்த போது தனக்கு 272 உறுப்பினர்களின் ஆதரவு இருக்கிறது என குடியரசுத் தலைவரை சந்தித்து கடிதம் அளித்தவர் ஆண்டோனியோ மெய்னோ காந்தி என்னும் சோனியா காந்தி. சமாஜ்வாதி கட்சித் தலைவர் முலாயம் சிங் யாதவ் சோனியா பிரதமர் ஆவதை ஏற்கவில்லை. அவர் தனது கட்சியின் ஆதரவுக் கடிதத்தை சோனியாவுக்கு வழங்கவில்லை. சோனியா பிரதமர் ஆக முயற்சித்தார் என்பதே உண்மை. இந்தியாவில் தினசரி நாளிதழ்கள் மூலம் அரசியல் நிகழ்வுகளை அறியும் சாமானிய இந்தியனுக்குக் கூட தெரிந்த விஷயமாகும் இது. 

2004ம் ஆண்டு மீண்டும் பிரதமராக முயற்சித்து 272 நாடாளுமன்ற உறுப்பினர்களின் ஆதரவுக் கடிதத்துடன் ஜனாதிபதி அப்துல் கலாமை சந்தித்தார் சோனியா. அவர் பிரதமராக பதவியேற்பதில் இருக்கும் ‘’சட்ட சிக்கல்கள்’’ சிலவற்றை ஜனாதிபதி அப்துல் கலாம் குறுப்புணர்த்தியதையும் அதனால் ஆண்டோனியோ மெய்னோ காந்தி என்னும் சோனியா காந்தி பதவியேற்காததையும் அப்துல் கலாம் தன் சுயசரிதையில் பதிவு செய்துள்ளார். 

ஆண்டோனியோ மெய்னோ காந்தி என்னும் சோனியா காந்தி பிறப்பால் இத்தாலியர். அவர் ராஜிவ் காந்தியைத் திருமணம் செய்து கொண்ட பின்னும் 15 ஆண்டுகள் இத்தாலியக் குடியுரிமையை மட்டுமே கொண்டிருந்தார். வெளிநாட்டுப் பிரஜை ஒருவர் பிரதமர் மனைவியாக இருப்பதன் அபாயங்களை நாட்டின் உயர் அதிகார மையங்களும் பாதுகாப்பு அமைப்புகளும் தொடர்ச்சியாக எடுத்துக் கூறிய வண்ணமே இருந்துள்ளன. 

முன்னாள் பிரதமர் நரசிம்ம ராவ் இறந்த போது அவரது உடல் காங்கிரஸ் கட்சியின் தலைமை அலுவலகத்தில் சில நிமிடங்கள் கூட வைக்கப்படக் கூடாது என்பதற்காக கட்சி அலுவலக் கதவுகளை பூட்டச் சொல்லி உத்தரவிட்டவர் சோனியா காந்தி. 

மோதிலால் நேரு, ஜவஹர்லால் நேரு, இந்திரா காந்தி, சஞ்சய் காந்தி, ராஜிவ் காந்தி, ஆண்டோனியோ மெய்னோ காந்தி என்னும் சோனியா காந்தி, பிரியங்கா காந்தி , ராகுல் காந்தி என நேரு குடும்பத்தைச் சேர்ந்த எட்டு பேர் இந்திய அரசியலில் முக்கிய பொறுப்பில் இருந்திருக்கின்றனர். 

உலகின் மிகப் பெரிய ஜனநாயக நாட்டின் நூற்றாண்டுக்கு மேல் ஆயுள் கொண்டிருக்கும் கட்சியின் தலைமையில் ஏன் 100 ஆண்டுகளுக்கும் மேலாக ஒரே குடும்பத்தைச் சேர்ந்த எட்டு பேர் மட்டுமே ஆதிக்கம் செலுத்தியிருக்கின்றனர் என்னும் கேள்விக்கு காங்கிரஸுக்கு வாக்களிப்பவர்களே விடை தேட வேண்டும். 

வீர சிவாஜி சிலை

இன்று காலை 10 மணியளவில் ஊரிலிருந்து 30 கி.மீ தொலைவில் இருக்கும் ஒரு கிராமத்துக்குச் சென்றிருந்தேன். அங்கே தற்செயலாக ஒரு வீட்டுக்குச் செல்ல நேர்ந்தது. அந்த வீடு 100 ஆண்டு காலப் பழமை கொண்டது. துடிப்புடன் இப்போதும் இயங்கிக் கொண்டிருக்கிறது. மிகவும் கலாபூர்வமாக வீட்டுக்கு வர்ணம் தீட்டியிருந்தார்கள். அந்த வீட்டாரின் தாய்மொழி மராத்தி என அறிந்தேன். மராத்திய எழுத்தாளர் வெங்கடேஷ் மாட்கூல்கர் எழுதிய ‘’பன்கர்வாடி’’ என்னும் மராத்திய நாவலை நான் வாசித்திருப்பதைக் கூறினேன். அவர்களுக்கு ஒரே ஆச்சர்யம். அந்த நாவலின் சுருக்கத்தை நான் அவர்களிடம் கூறினேன். மிகவும் மகிழ்ந்தார்கள். நான் வங்க மொழியைத் தாய்மொழியாகக் கொண்டவர்களை சந்திக்க நேர்ந்த போது எனக்கு மிகவும் பிடித்த எழுத்தாளர் தாராசங்கர் பானர்ஜி எனக் கூறியதைக் கேட்டு அவர்கள் நெகிழ்ந்து உருகியிருக்கிறார்கள். ஹிந்தியைத் தாய்மொழியாகக் கொண்டவர்களிடம் கிரிராஜ் கிஷோரின் ‘’சதுரங்கக் குதிரைகள்’’ எனக்கு மிகவும் பிடித்த நாவல் எனக் கூறும் போது வியப்படைந்திருக்கிறார்கள். குர் அதுல் ஐன் ஹைதர் எனக்கு மிகவும் பிரியமான உருது மொழி எழுத்தாளர் என்பதும் அவரது ‘’அக்னி நதி’’ எனக்கு மிகவும் விருப்பமான நாவல் என்பதும் பலரை ஆச்சர்யப்படுத்தியிருக்கிறது. பைரப்பாவையும் சிவராம காரந்தையும் வாசித்தவன் என்பதை அறிந்து சந்தோஷம் கொள்ளாத கன்னடர் இல்லை. தகழியின் செம்மீன் வாசித்தவன் என்பதை மலையாளத்தைத் தாய்மொழியாகக் கொண்ட எவரிடமும் பேசும் போது சொல்லியிருக்கிறேன். இந்தியா என்பது ஒரே உணர்வு என்பதை இப்படைப்பாளிகளின் படைப்புகள் எனக்கு மீண்டும் மீண்டும் உணர்த்தின. 

அந்த வீட்டின் நூலகத்தில் 1000 நூல்கள் இருந்தன. அதை எனக்குக் காட்டினார்கள். கி. ராஜநாராயணன் அவர்கள் அனைவருக்கும் பிரியமான எழுத்தாளர் என்பதைக் கூறினார்கள். ரொம்ப நேரம் மிகவும் உற்சாகமாக அவர்களுடன் உரையாடிக் கொண்டிருந்தேன். அங்கே செல்லும் போது அவர்கள் நூல் வாசிக்கக் கூடியவர்கள் என்பது எனக்குத் தெரியாது. 

மராட்டிய நிலம் குறித்தும் மராத்திய இலக்கியம் குறித்தும் பேசிக் கொண்டிருந்தோம். அப்போது நான் ஒரு விஷயம் அவர்களிடம் சொன்னேன். தமிழகத்தில் சத்ரபதி சிவாஜிக்கு ஒரு சிலை அமைக்க வேண்டும் எனக் கூறினேன். எனது மோட்டார் சைக்கிள் பயணங்களில் பல ஊர்களில் சத்ரபதி சிவாஜியின் சிலைகளைக் கண்டிருக்கிறேன். வீர சிவாஜியின் சிலை எவருக்கும் ஒரு துடிப்பை உருவாக்கும். அந்த சிலையைக் காண்பது என்பதே பெரும் உணர்வெழுச்சி. அந்த வீட்டில் இருந்தவர்களுக்கு இந்த யோசனை மிகுந்த மகிழ்ச்சியைக் கொடுத்தது. 

தமிழகத்தில் 1,00,000 சதுர அடியில் மையத்தில் வீர சிவாஜியின் பிரும்மாண்ட சிலை, சுற்றிலும் பூங்கா, அதில் வீர சிவாஜியின் வாழ்க்கையை விவரிக்கும் அருங்காட்சியகம், ஒளி ஒலி காட்சிகள் ஆகியவை அமைத்தால் சுற்றுலாப் பயணிகள் பலர் வந்து பார்வையிட்டு சிவாஜி வாழ்க்கையைக் குறித்து அறிந்து செல்ல உதவிகரமாக இருக்கும். 

இஸ்ரேல் தலைநகர் டெல் அவிவ் நகரில் இஸ்ரேல் அரசு வீர சிவாஜிக்கு சிலை நிறுவ உள்ளது. 

ஆயிரம் பசுக்கள்

தமிழக மக்கள் மிகவும் மகிழ்ச்சியுடன் கொண்டாடும் பண்டிகைகளில் ஒன்று தீபாவளி. அதற்கு ஒரு காரணம் உண்டு. பொதுவாக தமிழகத்தில் பண்டிகைகள் பகல் பொழுதில் இன்னும் சரியாகச் சொன்னால் நண்பகல் பொழுதில் கொண்டாடப்படுகின்றன. பொங்கல், வருடப் பிறப்பு, ஆயுத பூஜை ஆகியவற்றை உதாரணமாகக் கூற முடியும். காலை 10 மணிக்கு மேல் பொங்கல் வைக்கத் தொடங்கி படையலிட மதியம் 2 மணி ஆகி விடும். ஆயுத பூஜைக்கும் பூசனை மதியம் அல்லது மாலைப் பொழுதில் தான். வருடப் பிறப்பும் அவ்விதமே. எனினும் தீபாவளி மட்டுமே காலை மதியம் மாலை இரவு என நாள் முழுதும் கொண்டாடப்படும் பண்டிகை. காலை எழுந்ததுமே எண்ணெய் தேய்த்துக் கொள்ளுதல், கங்கா ஸ்னானம் ஆகியவை நிகழ்ந்து அனைவரும் புத்தாடை அணிந்து கொள்வர். தீபாவளியன்று இனிப்புகள் நிறைந்த காலை உணவு உண்பர். பின்னர் மதியமும் விருந்துணவு. மாலை பட்டாசுகள் வெடித்தல் என நாள் முழுதுமே அனைவருமே மகிழ்ச்சியாக இருக்கும் நாள் தீபாவளி.  

இன்று ஊருக்கு அருகில் இருக்கும் 1000 பசுக்கள் வாழும் ஆசாலைக்குச் சென்றிருந்தேன். ஒரு நல்ல நாளில் அந்த பசுக்களுடன் பொழுதை செலவிட்டது மிகவும் மகிழ்ச்சி தந்தது. பசுக்களுடன் பழகும் போது ஒரே சமயம் நாம் அன்னையாகவும் குழந்தையாகவும் இருப்போம். பசுவைப் போல சாதுவான பிரியமான இன்னொரு உயிர் இருக்குமா என்பது தெரியவில்லை. 

ஒளியை விரும்பு

நேசி

தோழமை கொள்

புரிந்து கொள்

உடன் இரு

பரவச் செய்

உரையாடு

வணங்கு

ஒளி பெறட்டும்

உடல்

மனம்

மொழி

ஒளி பெறட்டும்

உலகம்

ஒளி பெறட்டும்

உயிர்கள்

நிறையட்டும் ஒளி

எங்கும் 

இருளும் ஒளியும்

இருளிலிருந்து ஒளிக்கு இட்டுச் செல்க

மரணத்திலிருந்து அழியாமைக்கு இட்டுச் செல்க

என்கிறது உபநிஷத் பிரார்த்தனை. 

நித்யம் உலகின் ஒரு பாதி இருளிலும் உலகின் ஒரு பாதி ஒளியிலும் உள்ளது இயற்கையின் தன்மை. எனில் உபநிஷத் ஏன் இருளிலிருந்து ஒளிக்கு இட்டுச் செல்க என்கிறது? உலகில் உயிர்கள் இறப்பதும் பிறப்பதும் ஒவ்வொரு கணமும் நிகழ்வது. அவ்விதம் இருக்க உபநிஷத் ஏன் மரணத்திலிருந்து அழியாமைக்கு இட்டுச் செல்க என்கிறது?   

இருள் என்பது துவக்க நிலை. இருளில் அனைத்தும் பகுதியளவிலேயே காணப்படுகின்றன. ஒளி என்பது மேல்நிலை. ஒளியில் அனைத்தும் முழுதாகக் காணப்படுகின்றன. மேல்நிலையில் உணர துவக்க நிலையில் உணர்ந்தது அடிப்படையாக இருக்கும். துவக்க நிலையை முற்றுணராமல் மேல்நிலையை முற்றுணர முடியாது. இருளை முழுதாக அறியாமல் ஒளியை முழுதாக அறிய முடியாது. இருளும் ஒளியும் ஒரே விதமாக இருக்க உலகின் காட்சிகள் கணமும் மாறிக் கொண்டிருக்கின்றன. வளர்ச்சியும் சிதைவும் நிகழ்த்தும் தொடர் நாடகமே உலகம். 

மரணத்தை அறிந்த உணர்ந்த ஒருவரால் மட்டுமே அழியாமையை உணர முடியும். அழியாமையை உணர்தலின் ஒரு பகுதியே மரணத்தை உணர்தல் ; மரணத்தை அறிதல். 

உபநிஷத் இமைப் பொழுதும் ஓயாத ஒரு பயணத்தை பிரார்த்தனை செய்கிறது. உயிர்கள் ஒளியை முற்றுணரும் பயணம் ; உயிர்கள் அழியாமையை முற்றுணரும் பயணம். 

இருளிலிருந்து ஒளிக்கு இட்டுச் செல்க

மரணத்திலிருந்து அழியாமைக்கு இட்டுச் செல்க

இரு அன்னையர்

உற்சாகமும் உத்வேகமும் எனக்குத் தேவைப்பட்டது. காலைப் பொழுதில் நான் படித்த பள்ளியை நோக்கி இன்று நடந்தேன். ஒரு பள்ளி மாணவனாக பள்ளிக்கு நடந்து செல்லும் பருவம் என்பது இனிமையானது ; உன்னதமானது ; மகத்தானதும் கூட. என்னை சொந்தப் பிள்ளையாக - சொந்த பிள்ளையை விடவும் ஒரு படி மேலாகக் கருதிய - ஆசிரியர்கள் என் பள்ளியில் எனக்கு இருந்தார்கள். நடு வயதில் இருக்கும் நான் இப்போது எண்ணிப் பார்க்கிறேன். 10 வயது சிறுவனிடம் - 10 வயது சிறுவர்களிடம் ஆசிரியர்கள் அகத்துக்குத் தென்பட்ட ஒளி என்ன ? நம்பிக்கை என்ன? மானுடத்தில் பால பருவத்தின் ஒளியை தினமும் கண்ணுறும் ஆசிரியர்கள் பேறு பெற்றவர்கள். அத்தகைய ஆசிரியர்களிடம் பயிலும் பாலர்கள் மேலும் பேறு பெற்றவர்கள். என் பள்ளியில் என் மீது மிகவும் பிரியம் காட்டிய இரு ஆசிரியைகள் இருந்தனர். அவர்கள் பெயர் என்ன? எல்லா மகத்தான பெயர்களும் அவர்களின் பெயர்களே. பள்ளி முன் சென்று அந்த இரு ஆசிரியைகளையும் - அந்த இரு அன்னையரையும் - எண்ணிக் கொண்டேன். உளம் பொங்கி அழுதேன். அவர்கள் இருவரையும் நினைத்துச் சிந்தும் கண்ணீர் புனிதமானது. அவர்களை எண்ணி கண்ணீர் சிந்துபவன் என்பதே எனது தகுதி. 

லஞ்சத்தை நீக்க முயலும் அரசாங்கம்

ஓர் இந்தியக் குடிமகனாக அரசு நிர்வாகத்தில் லஞ்சம் ஒழிக்கப்பட வேண்டும் என நான் எப்போதும் எண்ணுவேன். சாமானிய குடிமக்கள் தங்கள் அவசியத் தேவைகளுக்காக அரசை அணுகும் ரேஷன் அட்டை தொடர்பான குடிமைப் பொருள் வழங்கும் துறை, தங்கள் நிலவிற்பனையைப் பதிவு செய்யும் பத்திரப் பதிவுத் துறை, பட்டாவுக்கு விண்ணப்பிக்கும் வருவாய்த்துறை, வீடு கட்ட அனுமதி அளிக்கும் உள்ளாட்சித் துறை, தங்கள் மோட்டார் வாகனங்களைப் பதிவு செய்யும் சாலைப் போக்குவரத்து துறை ஆகியவற்றில் லஞ்சம் முழுமையாக நீக்கப்பட வேண்டும் என எண்ணுவேன். சாமானிய பொதுமக்கள் இந்த அரசு அலுவலகங்களுக்கு மட்டுமே செல்ல வேண்டிய அவசியம் அடிக்கடி இருக்கிறது. இங்கே லஞ்சம் கேட்கப்பட்டால் தினமும் அந்த அலுவலகங்களுக்குச் செல்லும் லட்சக்கணக்கான மக்கள் அரசமைப்பின் மீதும் ஜனநாயகத்தின் மீதுமே அவநம்பிக்கை கொள்ளும் சூழல் உருவாகிறது என்பதால் குறைந்தபட்சம் இந்தத் துறைகளிலாவது லஞ்சம் நீக்கப்பட வேண்டும் என நான் எண்ணுவேன். 

தமிழகத்தை ஆண்ட திராவிடக் கட்சிகள் கடந்த 60 ஆண்டுகளில் மேலே குறிப்பிட்ட துறைகள் அனைத்திலும் லஞ்சத்தைக் கட்டவிழ்த்து விட்டன. பொதுப்பணித்துறை, நெடுஞ்சாலைத் துறை, மின்சாரத் துறை ஆகியவற்றில் கொள்ளை ஊழல்களை அரங்கேற்றிய திராவிடக் கட்சிகளின் அரசுகள் மேலே குறிப்பிட்ட துறைகள் மூலமும் லஞ்சம் பெற்றன ; தங்கள் ஊழல் வெளியில் தெரியாமல் இருக்க அரசு ஊழியர்கள் லஞ்சம் பெற முழுமையாக அனுமதித்தனர். 

தற்போது தமிழகத்தை ஆளும் அரசாங்கத்தில் ,  சாமானிய குடிமக்கள் தங்கள் அவசியத் தேவைகளுக்காக அரசை அணுகும் ரேஷன் அட்டை தொடர்பான குடிமைப் பொருள் வழங்கும் துறை, தங்கள் நிலவிற்பனையைப் பதிவு செய்யும் பத்திரப் பதிவுத் துறை, பட்டாவுக்கு விண்ணப்பிக்கும் வருவாய்த்துறை, வீடு கட்ட அனுமதி அளிக்கும் உள்ளாட்சித் துறை, தங்கள் மோட்டார் வாகனங்களைப் பதிவு செய்யும் சாலைப் போக்குவரத்து துறை ஆகியவற்றின் ஊழியர்கள் லஞ்சம் பெற லஞ்சம் கேட்க தயங்குகிறார்கள் ; அவர்களிடம் அச்சம் நிலவுகிறது. லஞ்சம் கேட்டால் பொதுமக்கள் எவரேனும் புகார் அளித்து விட்டால் அரசாங்க மேலிடம் தங்களைப் பாதுகாக்குமா என்னும் ஐயம் இப்போது அரசு ஊழியர்களுக்கு ஏற்பட்டிருக்கிறது. எனவே இப்போது பொதுமக்களைக் கசக்கிப் பிழிந்து லஞ்சம் வாங்கும் போக்கு மட்டுப்பட்டிருக்கிறது. 

மாநில அரசாங்கம் சாமானிய பொதுமக்கள் லஞ்சத்தால் பாதிக்கப்படக் கூடாது என எண்ணுவதை உணர்ந்து தங்கள் அறியாமையை நீக்கிக் கொண்டு விழிப்புணர்வுடன் அரசு ஊழியர்கள் லஞ்சம் கேட்டாலும் லஞ்சம் கொடுப்பதில்லை என்ற உறுதியுடன் இருப்பார்களேயானால் தமிழகத்தில் லஞ்சம் இல்லாமல் ஆகும். 

ஓரிரு நாட்கள் முன்னால் கட்டிட அனுமதி பெறுவதில் நிறைய புது வழிமுறைகளை மாநில அரசாங்கம் அறிவித்திருக்கிறது என்பதை அறிந்தேன். மிகவும் வரவேற்புக்குரிய விஷயமாகும் அது.