மாயப்பந்து

மழலை மாறா
மர்ஃபி ஆடுகளம் செல்கிறான்
மாலை நேரத்தில்
அடுத்த தெருவில் இருக்கும் மைதானத்துக்கு

பயணப்பட்டுக் கொண்டேயிருக்கின்றன
அவன் காணும் பந்துகள்
விண்ணில் பறந்து
மன்ணில் உருண்டு

அதன் பின்னால்
ஓயாமல் ஓடுகிறான்
சக ஆட்டக்காரர்களுடன்

உடைபடும் சோப்நுரை போல
பிடிக்கும் கணத்தில்
பந்து
பெரிய பையன்கள் கைக்கு செல்கிறது

அடுத்த பந்தை
எதிர்நோக்கும்
மர்ஃபியிடம்
பந்துகளின் தெய்வம்
கொடுத்து விட்டுச் செல்கிறது
கண்களால் காண முடியாத
பந்தொன்றை