மர்ஃபிக்கு இன்று விடுமுறை
காலையில் எப்போதும் போல் விழித்துக் கொண்டான்
ஆனாலும்
மீண்டும் தூங்கினான்
அவன் சகோதரி ஸ்கூலுக்கு கிளம்புவது குறித்து
மிக்க மகிழ்ச்சி அடைந்தான்
பார்ப்பவர்களிடமெல்லாம்
இன்னைக்கு எனக்கு ஸ்கூல் லீவு
என்றான்
சிலர்
அக்காவுக்கு
என்று கேட்பார்கள்
என்று எதிர்பார்த்தான்
அவன் எதிர்பார்ப்பு பொய்க்கவில்லை
அது குறித்து
அவ்வப்போது மகிழ்ந்தான்
டிஃபன் சாப்பிட்டு விட்டு
தன் பிளாஸ்டிக் மட்டையையும்
ரப்பர் பந்தையும்
எடுத்துக் கொண்டு
இன்று யார் யாருக்கு லீவாயிருக்கும்
என்ற எண்ணத்தோடு
அடுத்த தெருவில் இருக்கும்
மைதானத்துக்கு நடந்தான்
அதுவரை
அவனையே பார்த்துக் கொண்டிருந்த
கடவுள்
தன் வேலைக்குக் கிளம்பினார்
