கூடு

நீயே
எப்போதும்
சரியாகப் புரிந்து கொள்கிறாய்
கேட்கப்படாமலே மன்னிக்கிறாய்
உபசார சொற்களை எதிர்பாராதிருக்கிறாய்
கடினமான
எந்த சூழ்நிலையிலும்
செய்ய வேண்டியதைச் செய்து கொண்டிருக்கிறாய்

உன் முகம் வாடும்
உன் கண்களில்
நீர் துளிக்கும்
நாள் ஒவ்வொன்றிலும்

புதிதாய்
சிறகு முளைக்கும்
சேய்ப்பறவையொன்று
இரை தேடச் சென்று
இன்னும் திரும்பாததன்
துயரத்தை
ஒலித்துக் கொண்டிருக்கிறது
ஒரு பறவைக் கூடு