உன்னை
காதலிக்கத் தொடங்கும் முன்பே
உனது புன்னகைகள்
அத்தனை நேர்மையுடன்
அத்தனை நன்னம்பிக்கைகளுடன்
அத்தனை திறந்த மனத்துடன்
பரவி நிறைந்து கொண்டிருந்தன
முதல் பார்வையின்
முதல் உரையாடலின்
தயக்கம்
இல்லாமல் தான்
எவரையும்
எதிர்கொண்டாய்
எவரைப் பற்றிய
முன்முடிவையோ
இளக்காரத்தையோ
நீ மனத்தில் சுமக்கவில்லை
கனிவின் இசைவு
கனிவின் இசைமை
வெளிப்பட்டது
உன்
ஒவ்வொரு சிறு செயலிலும்
உன்னிடம்
உன் இயல்புகளாக
இவற்றைச் சொன்ன போது
யோசித்து
யோசித்து
பார்த்து
‘அப்படியா’
என்றாய்
