இது
கலங்கியிருக்கிறது
சலனமுற்றிருக்கிறது
வலியால் துடிக்கிறது
உடலின் வலிகள்
மனதின் வலிகள்
வாதைகள் வாட்டும் சுற்றம்
விலங்கிடப்பட்டிருக்கும் வாழ்க்கை
யாரிடம் அரற்றுவது
எதனிடம் சொல்வது
சங்கிலிகள் வலுவானவை
உடல் முழுதும்
பிணைத்துள்ளன இரும்புச் சங்கிலிகள்
மனதின் சுழல்கள்
மூழ்கடிக்கின்றன
காற்று நிறைக்கும் நுரையீரலை
நிறைத்து
நிரம்பிக் கொண்டிருக்கிறது
நீர்ச்சுழல்
வானுக்கும் மேலே
சூரியனுக்கும் மேலே
பேரொளியாய் ஜொலித்துக் கொண்டிருக்கிறாய்
கூக்குரல்களால்
அரற்றல்களால்
தவிப்பின் ஒலிகளால்
ஆனது பாதாளம்
உன்னை அழைக்க
உன் பெயர் சொல்ல
அறியா
அறிவின்மை
அழித்து விடு இறைவா
அழித்து விடு இறைவா
இதுதான் கோரிக்கை
இதைத்தான் கோர முடிந்தது
அறியாமை அழியும் போது
அங்கே
பூக்கிறது சுடரும் மலர்
வலிகள் அழியும் போது
அங்கே ஒலிக்கிறது இனிய இசை
துயர் நீங்குகையில்
அங்கே பரவி இருக்கிறது பேரொளி
சரண் புக வேண்டியது
குருவின் பாதம்
சரண் அடைய வேண்டியது
குருவின் பாதம்
