சமீபத்தில் ஒரு மனைத்தரகர் பரிச்சயமானார். அறிமுகம் இருக்கும் போதே அவர் குறித்து மதிப்பு உண்டு. பரிச்சயம் ஆனதும் அம்மதிப்பு மேலும் அதிகமானது.
ஊரின் பிரபலமான பள்ளிக்கு அருகில் எனக்கு 1 கிரவுண்டு இடம் உள்ளது. அதில் தரைத்தளம் முழுதும் வாகன நிறுத்தத்துக்கான இடமாக அமைத்து நான்கு தளங்களில் தளத்துக்கு 2 வீடு வீதம் 8 வீடுகள் கட்டி விற்பனை செய்ய வேண்டும் என்ற திட்டம் எனக்குள்ளது. தங்கம் விலை ஏறுவதால் மனை விலை சர சர என்று ஏறுகிறது. மனை வணிகத்துக்கு நிகழ்காலம் சாதகமான காலம்.
மனைத்தரகர்கள் பொதுவாக விற்பனைக்குத் தயாராக இருக்கும் வீட்டை விற்பனை செய்யவே விரும்புவார்கள். விற்பனை விரைவில் முடியும். விற்பனை நிறைவு பெற்றால் தான் கமிஷன் வரும். அடுக்குமாடி வீடு வேலை நடந்து கொண்டிருக்கும் போது என்றால் வேலை முடியவே 6 மாதமோ 9 மாதமோ 12 மாதமோ ஆகும். ஒவ்வொரு நிலையில் வாங்குபவர் பணம் கொடுக்கும் போது விற்பனை முழுவதும் நிறைவு பெற்ற பின் கமிஷன் தருகிறேன் என்று கூறுவார் ; விற்பவரும் அவ்விதமே கூறுவார். கமிஷன் வாங்க நீண்ட நாட்கள் ஆகும் என்பதால் மனைத்தரகர்கள் பணி நடந்து கொண்டிருக்கும் அடுக்குமாடி வீட்டு விற்பனைக்கு பேரார்வம் காட்ட மாட்டார்கள்.
என் திட்டத்தின் தற்போதைய நிலை என்னவெனில் இனி தான் கட்டிட அனுமதியே பெற வேண்டும். அதற்கே குறைந்தபட்சம் 3 மாதம் ஆகும். அதன் பின் கட்டுமானம் ; அதற்கு குறைந்தபட்சம் 15 மாதம் ஆகும். 2028 ஏப்ரல் ஆகி விடும் வீடு ஒப்படைக்க.
‘’அண்ணன் ! என் கிட்ட ஒரு பில்டிங் பிளான் இருக்கு. அதை கொஞ்சம் ஏ3 சைஸ் பேப்பர்ல என்லார்ஜ் செஞ்சு தரேன். 4 பார்ட்டி புக் செஞ்சு கொடுங்க. 18 மாசத்துல பில்டிங் கொடுத்துடலாம்’’ என்றேன்.
அண்ணன் என்னை அமைதியாகப் பார்த்தார்.
‘’அப்படியே ஒவ்வொரு பார்ட்டி கிட்டயும் 1 லேக் அட்வான்ஸ் வாங்கிக் கொடுங்க. பிராஜக்ட் ஆரம்பிச்சுடுவோம்’’
அண்ணன் எதுவும் சொல்லாமல் மேலும் அமைதியாகப் பார்த்தார்.
நான் விடைபெற்றுக் கொண்டு வந்து விட்டேன்.
வீட்டுக்கு வந்ததும் அண்ணனுக்கு ஃபோன் செய்தேன். ‘’அண்ணன்! வீட்டுக்கு வந்ததும் எனக்கு ஒரு ஐடியா தோணுச்சு. அதாவது நீங்க 4 பார்ட்டிகிட்ட 1 லேக் வீதம் 4 லேக் வாங்கித் தரீங்கள்ல அத நீங்களும் நானும் சேர்ந்து ஒரு ஜாயிண்ட் அக்கவுண்ட் ஆரம்பிச்சு பேங்க்ல போட்டு வச்சுடுவோம். அது உங்களுக்கு சேர வேண்டிய கமிஷன் பணம் தானே! மாசா மாசம் கிடைக்கற வட்டியை நீங்களும் நானும் பாதிக்குப் பாதி ஷேர் செஞ்சு எடுத்துப்போம். பிராஜக்ட் முடிஞ்சதும் அந்த அக்கவுண்ட் குளோஸ் பண்ணி முழுத் தொகையும் நீங்க எடுத்துக்கங்க.பிராஜக்ட் ஆரம்பிக்கறதுக்கு முன்னாடியே உங்களுக்கு கமிஷனும் உறுதியாகிடும். அதுக்கு மாசாமாசம் பேங்க் வட்டியும் கிடைக்கும். எனக்கும் 4 பார்ட்டி உறுதியாயிடும். பிராஜக்ட் ஸ்மூத்தா போகும்.’’
அண்ணனுக்கு என் ஐடியா பிடித்திருந்தது.
‘’தம்பி ! நாளைக்கு அமாவாசை. என் கிட்ட இருக்கற பார்ட்டி கிட்ட நான் நாளைக்கே பேசறேன்’’ என்றார் மகிழ்ச்சியுடன்.
எனக்கும் மகிழ்ச்சி.
